ಅಜಯ್ ರಾವ್ ಅಭಿನಯದ ‘ರಾಧೇಯ’ ಚಿತ್ರದ ಟೀಸರ್ ಲಾಂಚ್
ಅಜಯ್ ರಾವ್ ಅಭಿನಯದ ‘ರಾಧೇಯ’ ಚಿತ್ರದ ಟೀಸರ್ ಲಾಂಚ್!
ಕನ್ನಡ ಚಿತ್ರರಂಗದ ಪ್ರತಿಭಾವಂತ ನಟ ಅಜಯ್ ರಾವ್ ಇದೀಗ ಹೊಸ ಅವತಾರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅವರ ಹೊಸ ಸಿನಿಮಾ ‘ರಾಧೇಯ’ ಟೀಸರ್ ಬಿಡುಗಡೆಯಾಗಿದೆ. ವೇದಗುರು ಅವರು ಈ ಚಿತ್ರವನ್ನು ನಿರ್ದೇಶಿಸಿದ್ದು, ಇದೇ ಅವರ ನಿರ್ದೇಶನದ ಮೊದಲ ಪ್ರಯತ್ನ. ಕೀರ್ತಿ ಚಾಹ್ನಾ ಸಿನಿಮಾ ಕಾರ್ಖಾನೆ ಮೂಲಕ ನಿರ್ಮಾಣಗೊಂಡಿರುವ ಈ ಚಿತ್ರದಲ್ಲಿ ಅಜಯ್ ರಾವ್ ಜೊತೆ ಸೋನಾಲ್ ಮಾಂಟೆರೋ ನಾಯಕಿಯಾಗಿ ಅಭಿನಯಿಸಿದ್ದಾರೆ.
ನಿರ್ದೇಶಕ ವೇದಗುರು ಮಾತನಾಡಿ, “ಮಹಾಭಾರತದ ಕರ್ಣನ ಮತ್ತೊಂದು ಹೆಸರು ‘ರಾಧೇಯ’. ಆದರೆ ನಮ್ಮ ಚಿತ್ರದ ಕಥೆಗೆ ಕರ್ಣನೊಂದಿಗೆ ನೇರ ಸಂಬಂಧವಿಲ್ಲ. ಆದರೆ ಆತನ ತ್ಯಾಗದ ಅಂಶದಿಂದ ಪ್ರೇರಣೆ ಪಡೆದಿದ್ದೇವೆ. ಇದು ಲವ್ ಸ್ಟೋರಿಯಾದರೂ, ಹೊಸ ಶೈಲಿಯಲ್ಲಿ ಕಟ್ಟಿಕೊಡಲಾಗಿದೆ. ಮೊದಲಿಗೆ ಅಜಯ್ ರಾವ್ ಅವರಿಗೆ ಈ ಕಥೆ ಹೇಳಿದಾಗ ನಾನು ನಿರ್ದೇಶಕನಷ್ಟೇ ಇದ್ದೆ, ನಂತರ ನಿರ್ಮಾಪಕನಾದೆ. ಚಿತ್ರ ವಿತರಣೆಗೆ ಕಾಂತರಾಜು ಸರ್ ಶಕ್ತಿ ನೀಡುತ್ತಿದ್ದಾರೆ” ಎಂದು ಹೇಳಿದರು.
ಅಜಯ್ ರಾವ್ ತಮ್ಮ ಅನುಭವ ಹಂಚಿಕೊಳ್ಳುತ್ತಾ, “ನನ್ನ ಸಿನಿ ಜರ್ನಿಯಲ್ಲಿ ‘ರಾಧೇಯ’ ಒಂದು ವಿಶೇಷ ಹಂತ. ಈ ಚಿತ್ರದಲ್ಲಿ ನಾನು ಕ್ರಿಮಿನಲ್ ಆಗಿ ಜೈಲಿನಲ್ಲಿರುವ ಪಾತ್ರ ಮಾಡಿದ್ದೇನೆ. ಸ್ವಲ್ಪ ಸೈಕೋ ಶೇಡ್ ಇರುವ ಪಾತ್ರ ಇದು. ಇಂಥ ಪಾತ್ರ ಮಾಡುವುದು ನನಗೆ ಹೊಸ ಅನುಭವ. ನಿರ್ದೇಶಕ ವೇದಗುರು ಅವರೇ ಈ ಚಿತ್ರದ ನಿಜವಾದ ಹೀರೋ. ಅವರು ಎಷ್ಟೋ ಕಷ್ಟ ಪಟ್ಟು ಈ ಹಂತಕ್ಕೆ ತಂದಿದ್ದಾರೆ” ಎಂದರು.
ನಾಯಕಿ ಸೋನಾಲ್ ಮಾಂಟೆರೋ ಅವರು, “ಚಿತ್ರದಲ್ಲಿ ನಾನು ಅಮೃತ ಎಂಬ ಕ್ರೈಮ್ ರಿಪೋರ್ಟರ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದೇನೆ. ಲೋಕಲ್ ಚಾನೆಲ್ನಲ್ಲಿ ಕೆಲಸ ಮಾಡುವ ಈ ಹುಡುಗಿ ದೊಡ್ಡ ಚಾನೆಲ್ಗೆ ಹೋಗುವ ಕನಸು ಕಾಣುತ್ತಾಳೆ. ಈ ಪಾತ್ರ ನನಗೆ ಹೊಸದಾದ ಅನುಭವ ನೀಡಿತು,” ಎಂದು ಹೇಳಿದರು.
ಚಿತ್ರದ ವಿತರಕರಾದ ಕಾಂತರಾಜು ಅವರು, “ವೇದಗುರು ಚಿತ್ರ ನೋಡಲು ಕರೆದಾಗ ನಾನು ಆಶ್ಚರ್ಯಚಕಿತರಾದೆ. ಚಿತ್ರದಲ್ಲಿ ಹೊಸತನ ಮತ್ತು ಭಾವನಾತ್ಮಕ ಆಳವಿದೆ. ಅಜಯ್ ರಾವ್ ಅವರ ಅಭಿನಯ ಅದ್ಭುತವಾಗಿದೆ. ಈ ಕಾರಣದಿಂದಲೇ ಚಿತ್ರವನ್ನು ವಿತರಿಸಲು ಮುಂದಾದೆ” ಎಂದರು.
ನವೆಂಬರ್ 21ರಂದು ರಿಲೀಸ್ ಆಗಲಿರುವ ‘ರಾಧೇಯ’ ಚಿತ್ರಕ್ಕೆ ವಿಯಾನ್ (ಸ್ಯಾಂಡಿ) ಸಂಗೀತ ಸಂಯೋಜನೆ, ರಮ್ಮಿ ಛಾಯಾಗ್ರಹಣ ಮತ್ತು ಸುರೇಶ್ ಆರ್ಮುಗಂ ಸಂಪಾದನೆ ಮಾಡಿದ್ದಾರೆ. ಚಿತ್ರ ತಂಡವು ಹಂತ ಹಂತವಾಗಿ ಹಾಡುಗಳು ಮತ್ತು ಟ್ರೇಲರ್ ಬಿಡುಗಡೆ ಮಾಡುವ ಯೋಜನೆ ಹೊಂದಿದೆ.
