PMEGP ಯೋಜನೆ ಹೆಸರಿನಲ್ಲಿ 1.45 ಕೋಟಿ ರೂ. ವಂಚನೆ – ಮಹಿಳೆ ಬಂಧನ
PMEGP ಯೋಜನೆ ಹೆಸರಿನಲ್ಲಿ 1.45 ಕೋಟಿ ರೂ. ವಂಚನೆ – ಮಹಿಳೆ ಬಂಧನ
ಕೇಂದ್ರ ಸರ್ಕಾರದ ಪ್ರಧಾನ ಮಂತ್ರಿ ಉದ್ಯೋಗ ಸೃಜನ ಯೋಜನೆ (PMEGP) ಹೆಸರಿನಲ್ಲಿ ಸಬ್ಸಿಡಿ ಸಾಲ ಕೊಡಿಸುವುದಾಗಿ ಹೇಳಿ ಕೋಟ್ಯಂತರ ರೂ. ವಂಚಿಸಿದ್ದ ಆರೋಪದ ಮೇರೆಗೆ ಕೌಶಲ್ಯ ಎಂಬ ಮಹಿಳೆಯನ್ನು ಬ್ರಹ್ಮಾವರ ಪೊಲೀಸರು ಬಂಧಿಸಿದ್ದಾರೆ.
ಘಟನೆಯ ವಿವರ: 2023ರ ನವೆಂಬರ್ನಲ್ಲಿ ಬಾರಕೂರು ಹೇರಾಡಿಯ ಸರಿತಾ ಲೂವಿಸ್ ಅವರಿಗೆ PMEGP ಯೋಜನೆಯಡಿ ಸಬ್ಸಿಡಿ ಲೋನ್ ಮಾಡಿಸಿಕೊಡುವುದಾಗಿ ಕೌಶಲ್ಯ ಭರವಸೆ ನೀಡಿದ್ದಳು. ಸಾಲ ಪ್ರಕ್ರಿಯೆಗಾಗಿ ಹಂತ ಹಂತವಾಗಿ ಹಣ ಪಾವತಿಸಬೇಕೆಂದು ಹೇಳಿ, 80 ಲಕ್ಷ 72 ಸಾವಿರ ರೂ. ಮೊತ್ತವನ್ನು ಕೌಶಲ್ಯ ಹಾಗೂ ಆಕೆಯ ಪರಿಚಿತರಾದ ಸಂದೇಶ, ಪ್ರಕಾಶ, ಆಶೀಶ ಶೆಟ್ಟಿ, ರಾಜೇಂದ್ರ ಬೈಂದೂರು, ಗೀತಾ, ಹರಿಣಿ, ನವ್ಯ, ಕುಮಾರ್, ಮಾಲತಿ, ಪ್ರವೀಣ್, ಹರಿಪ್ರಸಾದ್, ನಾಗರಾಜ ಹಾಗೂ ಭಾರತಿ ಸಿಂಗ್ ಅವರ ಖಾತೆಗಳಿಗೆ ವರ್ಗಾಯಿಸಲಾಗಿತ್ತು ಎಂದು ದೂರಿನಲ್ಲಿ ಹೇಳಲಾಗಿದೆ.
ಅದೇ ರೀತಿಯಲ್ಲಿ ಅಂಜಲಿನ್ ಡಿ’ಸಿಲ್ವಾ ಎಂಬವರಿಗೂ ಸಾಲ ಮಾಡಿಸಿಕೊಡುವುದಾಗಿ ಹೇಳಿ, ಮತ್ತೊಮ್ಮೆ 65 ಲಕ್ಷ ರೂ. ಪಡೆದಿದ್ದಾಳೆ. ಒಟ್ಟು ₹1.45 ಕೋಟಿ ರೂ. ಹಣವನ್ನು ಕೌಶಲ್ಯ ವಂಚಿಸಿದ್ದು, ಬ್ಯಾಂಕ್ ನೌಕರರಂತೆ ದೂರವಾಣಿಯಲ್ಲಿ ಮಾತನಾಡಿ ನಂಬಿಕೆ ಗಳಿಸಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ. ದೂರು ಸ್ವೀಕರಿಸಿದ ಬಳಿಕ ಬ್ರಹ್ಮಾವರ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿ, ಆರೋಪಿ ಕೌಶಲ್ಯಳನ್ನು ಬಂಧಿಸಿದ್ದಾರೆ.
ತನಿಖೆಯ ಪ್ರಾಥಮಿಕ ಹಂತದಲ್ಲಿ ಆಕೆ ಹಲವರ ಖಾತೆಗಳ ಮೂಲಕ ಹಣ ವರ್ಗಾಯಿಸಿ, ಕೃತ್ಯವನ್ನು ಮುಚ್ಚಿಹಾಕಲು ಪ್ರಯತ್ನಿಸಿದ್ದಾಳೆ ಎಂಬುದು ಬಹಿರಂಗವಾಗಿದೆ. ಸರ್ಕಾರಿ ಯೋಜನೆಗಳ ಹೆಸರಿನಲ್ಲಿ ಖಾಸಗಿ ವ್ಯಕ್ತಿಗಳು ಸಾಲ ಅಥವಾ ಸಬ್ಸಿಡಿ ಕೊಡಿಸುತ್ತೇವೆ ಎಂದು ಹೇಳಿದರೆ ನಂಬಬಾರದು. ಅಂತಹವರು ವಂಚಕರು ಆಗಿರಬಹುದೆಂದು ಪೊಲೀಸರು ಸಾರ್ವಜನಿಕರಿಗೆ ಎಚ್ಚರಿಕೆ ನೀಡಿದ್ದಾರೆ.
