ಕರ್ನಾಟಕದ ಅತೀ ದೊಡ್ಡ ಅಬಕಾರಿ ಹಗರಣ – ನೂರು ಕೋಟಿ ರೂ. ಸಿಎಲ್-7 ಲೈಸೆನ್ಸ್ ವಂಚನೆ!

ಕರ್ನಾಟಕದ ಅತೀ ದೊಡ್ಡ ಅಬಕಾರಿ ಹಗರಣ – ನೂರು ಕೋಟಿ ರೂ. ಸಿಎಲ್-7 ಲೈಸೆನ್ಸ್ ವಂಚನೆ!

ಬೆಂಗಳೂರು: ರಾಜ್ಯದ ಅಬಕಾರಿ ಇಲಾಖೆಯಲ್ಲಿ ನೂರು ಕೋಟಿಗೂ ಹೆಚ್ಚು ಮೊತ್ತದ ಸಿಎಲ್-7 ಲೈಸೆನ್ಸ್ ಹಗರಣ ಬಯಲಾಗಿದೆ. ಲೈಸೆನ್ಸ್ ನೀಡುವಲ್ಲಿ ನಡೆದಿರುವ ಭಾರೀ ಅಕ್ರಮಗಳಿಂದ ಈಗ 20ಕ್ಕೂ ಹೆಚ್ಚು ಅಬಕಾರಿ ಅಧಿಕಾರಿಗಳು ಜೈಲು ಸೇರುವ ಸಾಧ್ಯತೆ ಇದೆ ಎಂಬ ಸುದ್ದಿಯು ಬಣ್ಣ ಬದಲಿಸಿದೆ.

ಕೆ.ಆರ್.ಪುರಂ ಹಾಗೂ ಅದರ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ನಕಲಿ ಬಾರ್ ಮತ್ತು ಲಾಡ್ಜ್ ಲೈಸೆನ್ಸ್‌ಗಳು ಪ್ರಚಲಿತದಲ್ಲಿದ್ದವು ಎಂದು ತಿಳಿದುಬಂದಿದೆ. ಇಲಾಖೆಯ ಕೆಲ ಅಧಿಕಾರಿಗಳೇ ಸಿಎಲ್-2, ಸಿಎಲ್-7 ಹಾಗೂ ಸಿಎಲ್-9 ಲೈಸೆನ್ಸ್‌ಗಳನ್ನು ನಕಲಿ ದಾಖಲೆಗಳ ಆಧಾರದ ಮೇಲೆ ನೀಡಿರುವುದು ಬಹಿರಂಗವಾಗಿದೆ. ಲಂಚಕ್ಕಾಗಿ ದಾಖಲೆಗಳಲ್ಲಿ ತಿದ್ದುಪಡಿ ಮಾಡಿ ಬಾರ್, ವೈನ್ ಶಾಪ್ ಹಾಗೂ ಲಾಡ್ಜ್‌ಗಳಿಗೆ ಅಕ್ರಮವಾಗಿ ಪರವಾನಗಿ ನೀಡಲಾಗಿದೆ ಎನ್ನಲಾಗಿದೆ.

ದೆಹಲಿಯ ಅಬಕಾರಿ ಹಗರಣವನ್ನು ಮೀರಿಸುವ ಮಟ್ಟದ ಈ ಅಕ್ರಮ ಈಗ ಕರ್ನಾಟಕದಲ್ಲಿ ಬೆಳಕಿಗೆ ಬಂದಿದೆ. ಲೈಸೆನ್ಸ್ ನೀಡುವ ಪ್ರಕ್ರಿಯೆಯಲ್ಲಿ ಅಬಕಾರಿ ಇನ್ಸ್ಪೆಕ್ಟರ್, ಎಕ್ಸೈಸ್ ಕಮಿಷನರ್, ಡಿಸಿ ಮಟ್ಟದ ಅಧಿಕಾರಿಗಳೂ ಭಾಗಿಯಾಗಿರುವ ಶಂಕೆ ವ್ಯಕ್ತವಾಗಿದೆ.
ಲೋಕಾಯುಕ್ತಕ್ಕೆ ಹರಿಪ್ರಸಾದ್ ಹಾಗೂ ಇತರರು ನೀಡಿದ ದೂರು ಆಧಾರದಲ್ಲಿ ತನಿಖೆ ಆರಂಭವಾಗಿದೆ.

ಕೆ.ಆರ್.ಪುರಂನ ಮೇಡಹಳ್ಳಿ ಪ್ರದೇಶದಲ್ಲಿನ ಸಿಆರ್ ಬೋರ್ಡಿಂಗ್ ಅಂಡ್ ಲಾಡ್ಜಿಂಗ್ ಹೆಸರಿನಲ್ಲಿ ನಿರ್ಮಾಣ ಹಂತದಲ್ಲಿದ್ದ ಕಟ್ಟಡಕ್ಕೂ ಸಿಎಲ್-7 ಲೈಸೆನ್ಸ್ ನೀಡಲಾಗಿದೆ. ಈ ಪ್ರಕ್ರಿಯೆಯಲ್ಲಿ ಕಿರಣ್ ಸಿ ಕೆ, ಬಿ ಕೆ ಶೇಖರ್, ನಿತಿನ್ ಕೆ, ಋತ್ವಿಕ್ ಹೆಸರಿನಲ್ಲಿ ಲೈಸೆನ್ಸ್ ಪಡೆದುಕೊಳ್ಳಲಾಗಿದೆ. ಕೇವಲ ಎಂಟು ಕೊಠಡಿಗಳ ಲಾಡ್ಜ್‌ನ್ನು 16 ರೂಂಗಳ ಲಾಡ್ಜ್ ಎಂದು ಸುಳ್ಳು ಮಾಹಿತಿ ನೀಡಿ ಪರವಾನಗಿ ಪಡೆದಿದ್ದಾರೆ ಎಂದು ದೂರು ಹೇಳುತ್ತದೆ.

ಅದೇ ರೀತಿ ಮಾರಗೊಂಡನಹಳ್ಳಿ ಪ್ರದೇಶದಲ್ಲಿ ವೈನ್ ಶಾಪ್‌ನ್ನು ಲಾಡ್ಜ್ ಎಂದು ತೋರಿಸಿ ವಿ.ಶ್ರೀನಿವಾಸ್ ಸಿಎಲ್-7 ಲೈಸೆನ್ಸ್ ಪಡೆದಿದ್ದಾರೆ. ಸೂರ್ಯ ಬೋರ್ಡಿಂಗ್ ಅಂಡ್ ಲಾಡ್ಜಿಂಗ್, ಬೃಂದಾವನ್ ಬಾರ್, ಕೊಲೆಪ್ಪ ಕಾನ್ಸೆಪ್ಟ್ ಪ್ರೈ.ಲಿ., ಅಭಿಲಾಷಾ ಬಾರ್ ಮುಂತಾದ ಸ್ಥಳಗಳಿಗೂ ನಕಲಿ ದಾಖಲೆಗಳ ಆಧಾರದ ಮೇಲೆ ಪರವಾನಗಿಗಳು ದೊರೆತಿವೆ.

ಅಕ್ರಮದಲ್ಲಿ ಕೈವಾಡವಿರುವ ಅಧಿಕಾರಿಗಳ ಪಟ್ಟಿಯಲ್ಲಿ :

ಅಬಕಾರಿ ಇನ್ಸ್ಪೆಕ್ಟರ್ ಭರತ್

ಎಕ್ಸೈಸ್ ಡಿವೈಎಸ್ಪಿ ತುಕಾರಾಂ ನಾಯಕ್

ಎಕ್ಸೈಸ್ ಡಿಸಿ ಅಜಿತ್ ಕುಮಾರ್
ಮತ್ತು ಇತರ 20 ಅಧಿಕಾರಿಗಳ ಹೆಸರುಗಳು ಸೇರಿವೆ.

ಈ ಪ್ರಕರಣದಲ್ಲಿ ಪಾಲ್ಗೊಂಡಿರುವ ಬಾರ್ ಹಾಗೂ ಲಾಡ್ಜ್ ಮಾಲೀಕರು ಕೂಡ ತನಿಖೆಯ ಅಡಿಯಲ್ಲಿ ಇದ್ದಾರೆ. ಭ್ರಷ್ಟಾಚಾರದಿಂದ ಸಿಕ್ಕಿರುವ ಲೈಸೆನ್ಸ್‌ಗಳು ಈಗ ಅವರನ್ನೇ ಸೆರೆಮನೆಗೆ ಕೊಂಡೊಯ್ಯುವ ಸಾಧ್ಯತೆ ಹೆಚ್ಚು.

ಇದು ರಾಜ್ಯದ ಅಬಕಾರಿ ಇಲಾಖೆಯ ಒಳಗೆ ಬೇರೂರಿರುವ ಭ್ರಷ್ಟಾಚಾರದ ಜೀವಂತ ಸಾಕ್ಷಿ. ಈಗ ಎಲ್ಲರ ಪ್ರಶ್ನೆ ಒಂದೇ — ದೆಹಲಿಯಂತೆಯೇ, ಕರ್ನಾಟಕದಲ್ಲೂ ಅಧಿಕಾರಿಗಳು ಮತ್ತು ಉದ್ಯಮಿಗಳು ಜೈಲಿಗೆ ಹೋಗುತ್ತಾರೆಯೇ?