ಶಬರಿಮಲೆಯಲ್ಲಿ ಭಕ್ತರ ದಟ್ಟಣೆ ಹೆಚ್ಚಳ: ಮಂಡಲ ಋತುವಿನಲ್ಲಿ 17 ಲಕ್ಷಕ್ಕೂ ಅಧಿಕ ಯಾತ್ರಿಕರು..
ಶಬರಿಮಲೆಯಲ್ಲಿ ಭಕ್ತರ ದಟ್ಟಣೆ ಹೆಚ್ಚಳ: ಮಂಡಲ ಋತುವಿನಲ್ಲಿ 17 ಲಕ್ಷಕ್ಕೂ ಅಧಿಕ ಯಾತ್ರಿಕರು..
ಶಬರಿಮಲೆ: ಮಂಡಲ ಪೂಜೆ ಕಾಲಾರಂಭವಾದ ಬಳಿಕ ಶಬರಿಮಲೆಯಲ್ಲಿ ಭಕ್ತರ ಸಂಚಾರ ದಿನೇದಿನೇ ಹೆಚ್ಚಾಗುತ್ತಿದ್ದು, ಇದುವರೆಗೆ 17 ಲಕ್ಷಕ್ಕೂ ಹೆಚ್ಚು ಯಾತ್ರಿಕರು ಸನ್ನಿಧಿಗೆ ಭೇಟಿ ನೀಡಿದ್ದಾರೆ ಎಂದು ದೇವಸ್ವಂ ಮಂಡಳಿ ತಿಳಿಸಿದೆ. ಇದುವರೆಗೂ 99,677 ಭಕ್ತರು ದರ್ಶನ ಪಡೆದರೆ, ಯಾತ್ರಿಕರ ಹೆಚ್ಚುವರಿ ಹರಿವನ್ನು ಗಮನಿಸಿ, ಪಂಪಾ ತಟದಿಂದ ಗುಂಪುಗಳಾಗಿ ಮಲೆ ಏರಲು ಅವಕಾಶ ನೀಡುವ ಕ್ರಮ ಜಾರಿಯಲ್ಲಿದೆ. ದರ್ಶನ ಪಡೆದ ನಂತರ ಹಿಂದಿರುಗುವ ಭಕ್ತರ ಸಂಖ್ಯೆಯನ್ನು ಆಧರಿಸಿ ಯಾತ್ರೆ ನಿಯಂತ್ರಣ ಮಾಡಲಾಗುತ್ತಿದೆ.
ಸನ್ನಿಧಾನದಲ್ಲಿ ಇನ್ನೂ ಮೂರು ದಿನಗಳಲ್ಲಿ ಕೇರಳ ಸದ್ಯ ವಿತರಣೆ ಆರಂಭವಾಗಲಿದೆ. ದಿನ ಬಿಟ್ಟು ದಿನ ಸದ್ಯ ಮತ್ತು ಪುಲಾವ್ ಪರ್ಯಾಯವಾಗಿ ಬಡಿಸುವ ನಿರ್ಧಾರವನ್ನು ದೇವಸ್ವಂ ಮಂಡಳಿ ಕೈಗೊಂಡಿದೆ. “ಒಂದು ದಿನ ಪುಲಾವ್ ನೀಡಲಾಗುತ್ತದೆ, ನಂತರದ ದಿನ ಸದ್ಯ ಬಡಿಸಲಾಗುತ್ತದೆ,” ಎಂದು ಟಿಡಿಬಿ ಅಧ್ಯಕ್ಷ ಕೆ. ಜಯಕುಮಾರ್ ತಿಳಿಸಿದ್ದಾರೆ. ಸದ್ಯದ ತಯಾರಿಗಾಗಿ ಅಗತ್ಯವಿರುವ ಸಾಮಗ್ರಿಗಳನ್ನು ಈಗಾಗಲೇ ಟೆಂಡರ್ ಪಡೆದ ಗುತ್ತಿಗೆದಾರರಿಂದಲೇ ಖರೀದಿಸಲಾಗುವುದು. ಈ ಬಗ್ಗೆ ಯಾವುದೇ ಕಾನೂನು ತೊಂದರೆ ಎದುರಾಗುವುದಿಲ್ಲ ಎಂಬ ವರದಿಯನ್ನು ದೇವಸ್ವಂ ಆಯುಕ್ತರು ಮಂಡಳಿಗೆ ಸಲ್ಲಿಸಿದ್ದಾರೆ. ಸದ್ಯದಲ್ಲಿ ಅನ್ನ, ಬೇಳೆ, ಸಾಂಬಾರ್, ಅವಿಲ್, ಉಪ್ಪಿನಕಾಯಿ, ತೋರನ್, ಹಪ್ಪಳ ಮತ್ತು ಪಾಯಸ ಸೇರಿದ್ದು, ಮಧ್ಯಾಹ್ನ 12ರಿಂದ ಸಂಜೆ 3ರವರೆಗೆ ಭಕ್ತರಿಗೆ ವಿತರಣೆ ಮಾಡಲಾಗುತ್ತದೆ.
ಪ್ರತಿ ವರ್ಷ ಎದುರಾಗುತ್ತಿರುವ ತ್ಯಾಜ್ಯ ವಿಲೇವಾರಿ ಸಮಸ್ಯೆಯನ್ನು ತಗ್ಗಿಸಲು, ಈ ಬಾರಿ ಬಾಳೆ ಎಲೆಯ ಬದಲು ಸ್ಟೀಲ್ ತಟ್ಟೆಗಳು ಮತ್ತು ಗ್ಲಾಸ್ಗಳ ಬಳಕೆಗೆ ಮಂಡಳಿ ಅನುಮತಿ ನೀಡಿದೆ. ಇದರಿಂದ ಪರಿಸರ ಪ್ರಭಾವ ಕಡಿಮೆಯಾಗುವ ನಿರೀಕ್ಷೆಯಿದೆ. ಪ್ರಸ್ತುತ ದೇವಸ್ವಂ ಮಂಡಳಿಯ ಅನ್ನದಾನ ನಿಧಿಯಲ್ಲಿ ಸುಮಾರು 9 ಕೋಟಿ ರೂಪಾಯಿ ಉಳಿದುಕೊಂಡಿದ್ದು, ಸದ್ಯ ಸೇವೆ ನಿರ್ವಹಣೆಗೆ ಯಾವುದೇ ಆರ್ಥಿಕ ಅಡಚಣೆ ಇರುವುದಿಲ್ಲ ಎಂದು ಜಯಕುಮಾರ್ ಸ್ಪಷ್ಟಪಡಿಸಿದ್ದಾರೆ.
ಡಿ. 2ರಿಂದಲೇ ಸದ್ಯ ಆರಂಭಿಸುವ ಯೋಜನೆ ಇದ್ದರೂ, ವ್ಯವಸ್ಥೆ ಕಲ್ಪಿಸುವಲ್ಲಿ ವಿಳಂಬ ಮತ್ತು ಸಾಮಗ್ರಿಗಳ ಖರೀದಿಗೆ ಸಂಬಂಧಿಸಿದ ಮಂಡಳಿಯ ಸದಸ್ಯರ ವೈಚಾರಿಕ ಭಿನ್ನಾಭಿಪ್ರಾಯಗಳಿಂದ ಸೇವೆಯ ಆರಂಭ ಮುಂದೂಡಲ್ಪಟ್ಟಿತ್ತು. ಕಾನೂನುಪರ ಅಂಶಗಳನ್ನು ಪರಿಶೀಲಿಸಲು ದೇವಸ್ವಂ ಆಯುಕ್ತರ ನೇತೃತ್ವದಲ್ಲಿ ಪ್ರತ್ಯೇಕ ಸಮಿತಿಯನ್ನೂ ರಚಿಸಲಾಗಿದೆ.
