ಬೆಂಗಳೂರು ನಗರದಲ್ಲಿ ನಕಲಿ ಬೀಡಿ ಪತ್ತೆ: ನ್ಯೂ ಎಸ್.ಕೆ. ಕಂಪನಿ ಪೊಲೀಸ್ ದೂರು
ಬೆಂಗಳೂರು, ಜುಲೈ 20:2025
ನಗರದ ಎಂ.ಎಸ್. ಪಾಳ್ಯ ಮುಖ್ಯ ರಸ್ತೆಯ ರಾಜಾರಾಮ್ ಟ್ರೇಡಿಂಗ್ ಅಂಗಡಿಯಲ್ಲಿ ನಕಲಿ ಬೀಡಿ ತಯಾರಿಕೆ ಹಾಗೂ ಮಾರಾಟ ನಡೆಯುತ್ತಿರುವುದನ್ನು ನ್ಯೂ ಎಸ್.ಕೆ. ಬೀಡಿ ಕಂಪನಿಯ ಪ್ರತಿನಿಧಿಗಳು ಪತ್ತೆಹಚ್ಚಿದ್ದಾರೆ. ಈ ಸಂಬಂಧ ಕಂಪನಿಯ ಜಿ.ಪಿ.ಎ ಹೋಲ್ಡರ್ ಆಗಿರುವ ಸೇಲ್ಸ್ ಮ್ಯಾನ್ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ನ್ಯೂ ಎಸ್.ಕೆ. ಬೀಡಿ ಕಂಪನಿಗೆ ಭಾರತ ಸರ್ಕಾರದಿಂದ 2004 ರಲ್ಲಿ ಟ್ರೇಡ್ ಮಾರ್ಕ್ (ನಂ. 66370/2004) ನೊಂದಣಿ ದೊರೆತಿದ್ದು, ಕಂಪನಿ ಕಾನೂನುಬದ್ಧವಾಗಿ ಬೀಡಿ ತಯಾರಿಸುತ್ತಿದೆ. ದೂರುದಾರರು bengaluru ನಗರ ಮತ್ತು ಗ್ರಾಮಾಂತರ ಜಿಲ್ಲೆಗಳಲ್ಲಿ ಕಂಪನಿಯ ಮಾರಾಟ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದಾರೆ.
ಜುಲೈ 17 ರಂದು ಬೆಳಿಗ್ಗೆ ಸುಮಾರು 6.30ಕ್ಕೆ, ದೂರುದಾರರು ಎಂ.ಎಸ್. ಪಾಳ್ಯ ಸರ್ಕಲ್ ಮೂಲಕ ತೆರಳುವ ಸಂದರ್ಭದಲ್ಲಿ ರಾಜಾರಾಮ್ ಅಂಗಡಿಯಲ್ಲಿ ನ್ಯೂ ಎಸ್.ಕೆ. ಬೀಡಿಗೆ ಹೋಲುವ ಬಣ್ಣ, ವಿನ್ಯಾಸ, ಲೇಬಲ್ ಹಾಗೂ ಪ್ಯಾಕಿಂಗ್ ಬಳಸಿ ನಕಲಿ ಬೀಡಿಗಳನ್ನು ಮಾರಾಟ ಮಾಡಲಾಗುತ್ತಿದೆ ಎಂಬುದು ಗಮನಕ್ಕೆ ಬಂದಿದೆ. ಈ ಬೀಡಿ ಬಂಡಲದ ಬೆಲೆ ರೂ.430/- ಎಂದು ತಿಳಿಸಲಾಗಿದೆ, ಇದು ನ್ಯೂ ಎಸ್.ಕೆ. ಕಂಪನಿಯ ಮೂಲ ಬೆಲೆಯ (ರೂ.414/- ) ಗಿಂತ ಹೆಚ್ಚಿನದು.
ಅಂಗಡಿ ಮಾಲೀಕರು ಕಾಫಿರೈಟ್ ಉಲ್ಲಂಘನೆ ಮಾಡಿ ನಕಲಿ ಉತ್ಪನ್ನಗಳನ್ನು ತಯಾರಿಸಿ ಮಾರಾಟ ಮಾಡುತ್ತಿದ್ದಾರೆ ಎಂಬುದಾಗಿ ದೂರಿನಲ್ಲಿ ತಿಳಿಸಿದ್ದಾರೆ. ಈ ಮೂಲಕ ಕಂಪನಿಯ ಹೆಸರಲ್ಲಿ ಸಾರ್ವಜನಿಕರಿಗೆ ಮೋಸ ಮಾಡಲಾಗುತ್ತಿದೆ.
ದೂರುದಾರರು ಜಿ.ಪಿ.ಎ ನಕಲು ಪ್ರತಿ, ಟ್ರೇಡ್ ಮಾರ್ಕ್ ದಾಖಲೆಗಳು ಮತ್ತು ಕಾಫಿರೈಟ್ ಪರವಾನಿಗೆ ಪತ್ರಗಳನ್ನು ವಿದ್ಯಾರಣ್ಯಪುರ ಪೊಲೀಸ್ ಠಾಣೆಗೆ ಲಗತ್ತಿಸಿ, ಆರೋಪಿಗಳ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಮನವಿ ಮಾಡಿದ್ದಾರೆ.
ವಿದ್ಯಾರಣ್ಯಪುರ ಪೊಲೀಸರು ಈ ಕುರಿತು ತನಿಖೆ ಆರಂಭಿಸಿದ್ದು, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
